Удирдагч, манлайлагч нар ажилтнуудаа энгийн үг, үйлдлээр урамшуулж, идэвхжүүлж чаддаг. Гэвч соёл, нийгэм, үнэт зүйл гээд буй бүхэн хувьсан өөрчлөгдөж байгаа өнөө үед ажлын байр ч өөрийнхөө хурдаар хувирч байна. Сүүлийн үеийн нэгэн судалгаанаас үзвэл, өнөө үед ажилтнуудын ихэнх нь ажил дээрээ тийм ч таатай, дуртай байхаа больжээ. Тухайлбал, судалгаанд оролцсон нийт ажилчдын ердөө 33 хувь нь ажил дээрээ таатай, идэвхтэй, харин бусад нь таагүй, бүүр дургүй байдаг талаараа дэлгэсэн байна.

Үүнийг хаанаас ч бодитоор харж болно. Бариста чинь зүгээр нэг нойрмог биш нь харваас илт. Сувилагч нар өвчтөний тусламж дуудсан хонхноос илүү утасныхаа шинэ зурвас ирсэн гэх хонхыг чухалчилдаг, үйлчилгээний операторууд юу хийж байгаа нь мэдэгдэхгүй таг алга болчихдог гэх мэт.

Хэрэв танай ажилтнууд идэвхгүй болоод байвал дараах гурван аргыг хэрэглээд үзэхэд гэмгүй гэнэ.

Сонс

Ажил дээр хэн ч туслахгүй, ямар ч найдваргүй гэсэн бодлоос болж идэвх багасах, үгүй болох явдал олон бий. Ийм үед тэд өөрийг нь хэн ч ойлгохгүй, ийм ажлын байрыг яаж ч хичээгээд сайжруулж чадахгүй юм байна гэж боддог болохоор аргагүй шүү дээ. энэ байдал даамжирвал тухайн ажилтан чимээгүйхэн ажлаа хүлээлгээд өгөх нь цаг хугацааны л асуудал.

Мэргэжилтнүүдийн зөвлөснөөр хүн өөрийг нь хэн нэгэн харж, сонсож, ойлгож байгааг мэдэхэд зан байдал нь эрс өөрчлөгддөг гэнэ.

Иймд тухайн ажилтантай, эсвэл нийтийн дунд сонсох цаг гаргаж үзээрэй. Юу бодож, мэдэрч байгаагаа ажилтнууд чинь хэлмээр, мэдүүлмээр л байгаа. Гэхдээ асуудал, мэдрэмжээ ярьж, хэлж байгаа ажилтнууддаа зөвлөгөө өгч, асуудлыг нь шийдэх гэж яарч, эсвэл шүүмжилж болохгүй шүү, зүгээр л сонсоорой. Бас ойлгож байгаагаа илэрхийлээрэй. Асуудлыг дараа шийдэж болно шүү дээ.

Сонголт өг

Ажлын ирээдүй өөрөөс нь бага ч гэсэн шалтгаалж, өөрийн хийх юмыг ч болтугай өөрөө сонгодог байвал ажилтнууд идэвхтэй байдаг.

Иймийн тул ажилтнуудынхаа үнэт зүйл, ажлын зан байдал хооронд ямар холбоо байгааг ажиглаарай. Жишээлбэл, эмнэлгийн сувилагч нарын хувьд үнэт зүйл нь бусдад туслах байж болно. Технологийн салбарт ажиллаж байгаа хүн бол бүтээлч, шинийг эрэлхийлэгч үнэт зүйлтэй байгаа байх. Яриан дундаа ажилтнуудаасаа дээрх үнэт зүйлээ хэр баримталж чадаж байгааг нь асуугаад үзээрэй. Тэгээд түүнийг нь улам дэмжихийн тулд юу хийж болох талаар бодох хэрэгтэй. Бас сониуч байж, аливаа эерэг өөрчлөлт хийхэд юу шаардлагатай байгаа талаар бодлыг нь ч сонсоод авахад буруудахгүй.

Магтаж бай

Магтаал маш үр дүнтэй. Хүмүүс алдаа хийсэн үедээ загнуулахдаа бэлтгэлтэй, баргийн үг сэтгэлд нь орохооргүй болтол хана босгосон байдаг. Гэхдээ сайн юм хийсэн үед хэн ч өөрийгөө бэлдэж, хана босгоогүй байдаг аж.

Иймд аливаа сайн үйл, амжилт бүтээлийг цаг тухайд нь магтаж байх нэн чухал. Цаашлаад ажлын байрны соёл болгочихвол бүүр л хэрэгтэй. Жишээлбэл, хурал цуглаан дээр нэгнийхээ сайн талыг нийтэд ил тод магтдаг болчихвол тэдний идэвх дороо сайжирна.